આજ રોજ વડોદરા મહાનગર પાલિકાના વોર્ડ નં 10 માં આવતા વાસણા જકાત નાકા વિસ્તારમાં રસ્તા પર પડેલા ભુવા પાસે દેખાવો કરતો એક માસ્ક મેન એ આકર્ષણ જમાવ્યું હતું. મોઢા પર માસ્ક પહેરીને શહેરના રસ્તાઓ પર પડેલા ભુવા અને તેનાથી પડતી સ્થાનિકોને તકલીફને ઉજાગર કરવા આ યુવકે અનોખો વિરોધ નોંધાવ્યો હતો.

જયારે આ યુવક ને પૂછવામાં આવ્યું કે આ માસ્ક પહેરીને કેમ.? તો યુવક નો જવાબ ધ્યાન ખેંચી લે તેવો હતો. યુવકે જણાવ્યું કે અનેકો વાર રજુઆત કરવા છતાંય આ નેતાઓનું પેટ નું પાણીએ હાલતું નથી. અને જો ઉગ્ર વિરોધ કે જાહેરમાં વિરોધ કરીએ તો સત્તા નો દુરુપયોગ કરી પોલીસ પાછળ લગાવી દે છે. ત્યારે હવે જો આ કુમ્ભકર્ણ નિંદ્રા માણતા આ સત્તાધીશોથી બચવા અને લોકોમાં જાગૃતિ લાવવા તેણે માસ્ક પહેરી ને વિરોધ નોંધાવ્યો છે. તે યુવકને ડર છે કે જો તેની ઓળખ ઉજાગર થાય તો પોતાની ફરજમાં નિષ્ફળ ગયેલા આ નેતાઓ તેને હાનિ પહોંચાડી શકે છે. જેને લઇ તે યુવકે આ રીતે વિરોધ નોંધાવવા નો નવો કીમિયો અપનાવ્યો છે.