ચૂંટણી પહેલાં જ વડોદરા જિલ્લામાં જાણે ભગવો લહેરાયો તેવા દ્રશ્યો જોવા મળી રહ્યાં છે. કારણ કે, ભૂતકાળમાં ભાજપના કેટલાક ઉમેદવાર બિનહરિફ જાહેર થયા છે. પરંતુ વર્ષ 2026ની ચૂંટણીમાં આટલી મોટી સંખ્યામાં બિનહરિફ ઉમેદવારો જાહેર થયા હોય તે રેકોર્ડ બ્રેકિંગ માનવામાં આવી રહ્યું છે.

વડોદરા જિલ્લાના પ્રભારી તરીકે ડો. ઋત્વિજ પટેલની નિમંણૂક થતાની સાથે જ તેમણે આક્રમક વલણ અપનાવી તમામ બેઠકો પર જીત હાંસલ કરવાનો વિશ્વાસ વ્યક્ત કર્યો હતો. જોકે બુધવારે ઉમેદવારી પત્ર પરત ખેંચવાનો છેલ્લો દિવસ હોવાથી કોંગ્રેસ, અપક્ષ અને આપના ઉમેદવારોએ પોતાની હાર સ્વીકારી ફોર્મ પરત ખેંચી ભાજપના 40 ઉમેદવારો બિનહરિફ વિજેતા જાહેર થયા છે.

વડોદરા જિલ્લાની તમામ બેઠકો પર જીત હાસીલ કરવા માટે પ્રદેશ ભાજપે ડો. ઋત્વિજ પટેલની જિલ્લાના પ્રભારી તરીકે નિમણૂંક કરી હતી. જિલ્લાનો ચૂંટણી લક્ષી કારભાર સંભાળતાની સાથે જ ડો. ઋત્વિજ પટેલે જિલ્લાના તમામ ધારાસભ્યો અને સંગઠનના હોદ્દેદારોને સાથે રાખી ચર્ચા વિચારણા કરી ઉમેદવારોની યાદી પ્રદેશ સંગઠને જાહેર કરી હતી. ઉમેદવારોના નામો જાહેરાત થતાની સાથે જ અમુક જગ્યાએ અસંતોષની લાગણી જોવા મળી હતી. પરંતુ ભાજપે આખરે ડેમેજ કંટ્રોલ કરી લીધો હતો.

સ્થાનિક સ્વરાજ્યની ચૂંટણી આગામી 26મી એપ્રિલ, 2026ના રોજ યોજાનાર છે, ત્યારે બુધવારે ઉમેદવારી પત્ર પાછા ખેંચવાનો આજે અંતિમ દિવસ હતો. તેવામાં વડોદરા જિલ્લા-તાલુકા પંચાયત અને ચાર નગર પાલિકામાંથી કોંગ્રેસ, અપક્ષ અને આમ આદમી પાર્ટીના ઉમેદવારોએ પોતાની ઉમેદવારી પાછી ખેંચી લેતા 40 બેઠકો પર ભાજપે ચૂંટણી પહેલાંજ ભગવો લહેરાવી દીધો

છે.