ગુજરાતમાં આગામી સમયમાં યોજાનારી સ્થાનિક સ્વરાજ્યની ચૂંટણીઓ માટે રાજકીય ગરમાવાએ ગતિ પકડી છે. સત્તાધારી પક્ષ ભાજપ અત્યારથી જ એક્શન મોડમાં આવી ગઈ છે. ચૂંટણીના જંગમાં વિજયી બનવા માટે પક્ષ દ્વારા રણનીતિ ઘડવામાં આવી રહી છે, જેના ભાગરૂપે આવતીકાલથી રાજ્યભરમાં નિરીક્ષકોની ફોજ ઉતારીને સેન્સ લેવાની પ્રક્રિયા હાથ ધરવામાં આવશે.

ભાજપના મહુડી મંડળ દ્વારા દરેક જિલ્લા અને મહાનગરો માટે ખાસ નિરીક્ષકોની નિમણૂક કરવામાં આવી છે. આ નિરીક્ષકો આવતીકાલથી જે-તે વિસ્તારની મુલાકાત લેશે અને સંભવિત ઉમેદવારોને સાંભળશે. આ પ્રક્રિયા આગામી 3 થી 4 દિવસ સુધી સતત ચાલશે. સ્થાનિક કાર્યકરો અને દાવેદારો સાથે રૂબરૂ મુલાકાત કરીને પક્ષની પક્કડ કેટલી મજબૂત છે અને જનતાનો મિજાજ શું છે, તે જાણવાનો પ્રયાસ કરવામાં આવશે.

નિરીક્ષકો દ્વારા માત્ર સાંભળવાની પ્રક્રિયા જ નહીં, પરંતુ યોગ્ય ઉમેદવારોની પસંદગી માટે 'પેનલ' તૈયાર કરવામાં આવશે. મહાનગરપાલિકા અને નગરપાલિકા વિસ્તારોમાં વોર્ડ પ્રમાણે ઉમેદવારોની યાદી તૈયાર થશે. તેવી જ રીતે, તાલુકા પંચાયત અને જિલ્લા પંચાયતમાં દરેક સીટ દીઠ સક્ષમ ઉમેદવારોની પેનલ બનાવવામાં આવશે. આ પેનલમાં નામો નક્કી કરતી વખતે ઉમેદવારની છબી, લોકપ્રિયતા અને જ્ઞાતિગત સમીકરણોને ધ્યાને રાખવામાં આવશે.

નિરીક્ષકો દ્વારા તૈયાર કરવામાં આવેલી આ પેનલ અને તેમના મંતવ્યો પ્રદેશ કક્ષાએ મોકલવામાં આવશે. ત્યારબાદ, ભાજપનું પ્રદેશ પાર્લમેન્ટ્રી બોર્ડ આ અહેવાલના આધારે ઉમેદવારોના નામ પર આખરી મહોર મારશે. નિરીક્ષકોનો રિપોર્ટ જ ઉમેદવારની ટિકિટ નક્કી કરવામાં મહત્વની ભૂમિકા ભજવશે. આ પ્રક્રિયા દ્વારા ભાજપ આંતરિક અસંતોષ ઘટાડવા અને માત્ર જીતી શકે તેવા ઉમેદવારોને જ મેદાને ઉતારવા માંગે છે.