Vadodara : ગુજરાત પોલીસ દ્વારા POCSO એક્ટ હેઠળ નોંધાતા ગુનાઓને ખુબ ગંભીરતાથી લઈ કાર્યવાહી કરતી હોય છે અને પોલીસ આ પ્રકારના ગુનામાં કોઈ પણ પ્રકારની બેદરકારી ન થાય તેનું પણ વિશેષ ધ્યાન રાખતી હોય છે. રાજ્યના નાયબ મુખ્યમંત્રી હર્ષ સંઘવીએ જાહેરમંચ ઘણી વખત બાળકોના ખાસ કરીને સગીર દીકરીઓના રક્ષણ બાબતે ભાર મુકતા આવ્યા છે તેમજ રાજ્યમાં નોંધાતા POCSO એક્ટ હેઠળના ગુનાઓમાં પોલીસ દ્વારા વધુ ઝડપી કાર્યવાહી થાય તેની ઉપર તેમની ખાસ નજર હોતી હોય છે.

નોંધાયેલા 7માંથી 7 કેસમાં 100% સજા સુનિશ્ચિત કરી દાખલો બેસાડ્યો.
હાલ બોરસદ પોલીસ સ્ટેશનમાં ફરજ બજાવતા અને પેટલાદ વિભાગના તત્કાલીન પોલીસ ઇન્સ્પેક્ટર ડી.આર. ચૌધરી અને તેમની ટીમે આણંદ જિલ્લામાં POCSO એક્ટ હેઠળ નોંધાયેલા 7 સંવેદનશીલ અને ગંભીર ગુનાઓમાં બધા જ કેસમાં 100% સજા સુનિશ્ચિત કરી દાખલો બેસાડ્યો છે. એમાંથી 6 કેસમાં કોર્ટ દ્વારા આરોપીઓને આજીવન કેદની કડક સજા સંભળાવાઈ છે. PI ડી.આર. ચૌધરી દ્વારા દરેક કેસમાં માત્ર 45 દિવસમાં ચાર્જશીટ દાખલ કરાઈ હતી જેમાં 8-9 મહિનામાં જ ન્યાયાલય તરફથી ચુકાદો આપવામાં આવ્યો છે.

પોલીસ ઇન્સ્પેક્ટર ડી.આર. ચૌધરી

નાયબ મુખ્યમંત્રી હર્ષ સંઘવીએ પ્રશંસા કરી
રાજ્યના નાયબ મુખ્યમંત્રી હર્ષ સંઘવીએ પોતાના સોશ્યિલ મીડિયા હેન્ડલ પર પોલીસ ઇન્સ્પેક્ટર ડી.આર. ચૌધરી અને તેમની ટીમ દ્વારા કરેલ સરાહનીય કામગીરી બદલ પ્રશંસા કરી હતી.

POCSO - બાળકોનું જાતીય ગુનાઓથી રક્ષણ
18 વર્ષથી ઓછી ઉંમરનાં બાળકોનું જાતીય ગુનાઓથી રક્ષણ માટે આ કાયદો બનાવવામાં આવ્યો હતો. જાતીય ગુનાઓથી બાળકોનું રક્ષણ અધિનિયમ (POCSO- Protection of Children from Sexual Offences) 2012 હેઠળ પોલીસ દ્વારા ગુનો નોંધી કાર્યવાહી કરવામાં આવતી હોય છે. આ કાયદાનો ઉદ્દેશ્ય બાળકોને જાતીય હુમલો, જાતીય સતામણી અને પોર્નોગ્રાફીના ગુનાઓથી બચાવવા માટે એક મજબૂત કાનૂની માળખું પૂરું પાડવાનો છે, સાથે સાથે ન્યાયિક પ્રક્રિયાના દરેક તબક્કે બાળકના હિતનું રક્ષણ કરવાનો છે. આ કાયદામાં બાળ-મૈત્રીપૂર્ણ પ્રક્રિયાઓ માટે જોગવાઈઓ છે જેમાં રિપોર્ટિંગ, પુરાવા રેકોર્ડ કરવા અને તપાસનો સમાવેશ થાય છે, તેમજ નિયુક્ત વિશેષ અદાલતો દ્વારા કેસોની ઝડપી સુનાવણી પણ થાય છે .