ભારતીય જનતા પાર્ટીએ સમગ્ર દેશના સંગઠનમાં અને ચૂંટણીઓમાં યુવાનોને મહત્વપૂર્ણ જવાબદારીઓ અને જનપ્રતિનિધિ તરીકે તક આપવાનું શરુ કર્યું છે. એ પછી વાત ગુજરાતના નાયબ મુખ્યમંત્રી હર્ષ સંઘવીની હોય, પ્રદેશ મહામંત્રી પ્રશાંત કોરાટની હોય કે પછી વડોદરા લોકસભા સાંસદ ડૉ હેમાંગ જોશી હોય. ભાજપ એ એવી રાજનૈતિક પાર્ટી છે સંગઠનમાં કાર્યરત યુવાઓની ક્ષમતાનું અવલોકન કરીને યોગ્ય જવાબદારી સોંપતી હોય છે અને યુવા કાર્યકરો આ તકને ઝડપીને જવાબદારીને ન્યાય આપતા હોય છે.

વડોદરા જિલ્લાના યુવા અને પ્રતિભાશાળી, કાનૂની વ્યવસાય સાથે સંકળાયેલ એડવોકેટ બ્રિજેશ નરેન્દ્રભાઈ પટેલને તાજેતરમાં વડોદરા જિલ્લા ભાજપમાં મહામંત્રી તરીકે જવાબદારી સોંપવામાં આવી છે. તેમના લાંબા સમયથી ચાલતા સંગઠનાત્મક યોગદાન અને સક્રિય સેવાઓને ધ્યાનમાં રાખીને આ મહત્વપૂર્ણ જવાબદારી સોંપવામાં આવી છે. હાલમાં ગુજરાત હાઇકોર્ટ ખાતે એડવોકેટ તરીકે કાનૂની ક્ષેત્રમાં કાર્યરત છે. તે લાંબા સમયથી કાનૂની ક્ષેત્રમાં સક્રિય રહી અનેક મહત્વપૂર્ણ કેસોમાં પોતાની કુશળતા દર્શાવી ચૂક્યા છે.

બ્રિજેશ પટેલ કોલેજના સમયથી જ સંગઠનાત્મક પ્રવૃત્તિઓ સાથે જોડાયેલા રહ્યા છે અને તેઓ રાષ્ટ્રીય સ્વયંસેવક સંઘ તેમજ ધાર્મિક સંસ્થાઓ સાથે પણ સંકળાયેલા છે. રાષ્ટ્રપ્રેમ, સંસ્કાર અને સંગઠન પ્રત્યેની નિષ્ઠા તેમના કાર્યમાં સ્પષ્ટપણે જોવા મળે છે. સંગઠનમાં તેમણે અનેક મહત્વપૂર્ણ હોદ્દાઓ પર જવાબદારીઓ નિભાવી છે, તે 2022 ની વાઘોડિયા વિધાનસભા ચૂંટણીમાં ઉમેદવાર એજન્ટ તરીકે કાર્યરત રહ્યા હતા.

સંગઠનાત્મક રીતે તેઓ વડોદરા જિલ્લા કાનૂની સેલના સંયોજક ની જવાબદારી પણ નિભાવી ચુક્યા છે. 2024 ની લોકસભા ચૂંટણી દરમિયાન તેમણે આચારસંહિતા પ્રભારી અને કાનૂની ટીમના સભ્ય તરીકે વડોદરા લોકસભા મતવિસ્તારમાં મહત્વપૂર્ણ જવાબદારી નિભાવી હતી. હાલમાં તેઓ વડોદરા ચાઈલ્ડ વેલ્ફેર કમિટીના સભ્ય તરીકે પણ કાર્યરત છે.

ઉચ્ચ શિક્ષણ, કાનૂની અનુભવ, સંગઠનાત્મક કાર્યકુશળતા અને રાષ્ટ્રસેવાના ભાવ સાથે બ્રિજેશ પટેલ સતત સમાજ અને સંગઠન માટે કાર્યરત રહ્યા છે. તેઓ હંમેશા રાષ્ટ્ર, ધર્મ અને સંગઠનને પ્રથમ સ્થાન આપતા આવ્યા છે. આ તમામ ગુણો અને તેમના લાંબા સમયથી ચાલતા યોગદાનને ધ્યાનમાં રાખીને તેમને વડોદરા જિલ્લા ભાજપમાં જિલ્લા મહામંત્રી તરીકે નિમણૂક કરવામાં આવી છે, જે વડોદરા જિલ્લાના સંગઠનને વધુ મજબૂત બનાવવામાં મહત્વપૂર્ણ સાબિત થશે.