ગુજરાત સરકારે પોલીસ ના 37 IPS અધિકારીઓની કરેલ બદલી સમગ્ર રાજ્યમાં ચર્ચાનો વિષય બન્યો હતો. ત્યાં જ વડોદરા શહેર પોલીસની તાકાતમાં પણ વધારો થયો. અત્યાર સુધી વડોદરા શહેર પોલીસ કમિશનર નરસિમ્હા કોમારના નેજા હેઠળ ફકત એક જ અધિક પોલીસ કમિશનર ડૉ લીના પાટીલ જવાબદારી સંભાળી રહ્યા હતા. IPS અધિકારીઓની થયેલ બદલીમાં ડૉ લીના પાટીલ ને કરાઈ ખાતે પોલીસ એકેડેમીના પ્રિન્સીપાલ તરીકે જવાબદારી મળતાં તેમને વડોદરા શહેરના અધિક પોલીસ કમિશ્નર તરીકે વિદાય લીધી છે.

વડોદરા શહેર પોલીસની ઉર્જામાં વધારો
ગુજરાત સરકારે વડોદરા શહેરના નાગરિકોની સુરક્ષા વ્યવસ્થાને ધ્યાનમાં રાખી પોલીસ કમિશનરની નેજા હેઠળ એક નહિ પરંતુ બે ઉચ્ચ અધિકારીઓની નિમણુંક કરી વડોદરા શહેર પોલીસની ઉર્જામાં વધારો કર્યો છે. હવે વડોદરા શહેર પોલીસના સંયુક્ત પોલીસ કમિશનર તરીકે IG રેન્કના નિલેશ જાજડીયા એ પદભાર સંભાળ્યો છે તેમજ તેમની સાથે અધિક પોલીસ કમિશ્નર તરીકે DIG રેંકના ડૉ. સુધીર દેસાઈએ પણ પદભાર સંભાળી લીધો છે.

સયુંકત પોલીસ કમિશ્નર નિલેશ જાજડીયા (ક્રાઇમ અને સેક્ટર 2)

સયુંકત પોલીસ કમિશ્નર નિલેશ જાજડીયાને ક્રાઇમ અને સેક્ટર 2ની જવાબદારી સોંપવામાં આવી છે. એનો મતલબ એ છે કે તેમના ખબા પર શહેરમાં થતાં ગુન્હાઓને અટકાવાની મહત્વપૂર્ણ જવાબદારી રહેશે તેમજ સેક્ટર 2 ના ઝોન 3 અને ઝોન 4ના પોલીસ મથકોની જવાબદારી પણ રહેશે. નિલેશ જાજડિયા 2006 બેચના IPS અધિકારી છે અને તેમણે અનેક જિલ્લાઓના પોલીસ અધિક્ષક (SP) તરીકે પણ સેવા આપી છે.

અધિક પોલીસ કમિશ્નર ડૉ. સુધીર દેસાઈ (ટ્રાફિક અને સેક્ટર 1)

અધિક પોલીસ કમિશ્નર ડૉ. સુધીર દેસાઈને ટ્રાફિક અને સેક્ટર 1 ની જવાબદારી સોંપવામાં આવી છે. શહેરમાં ટ્રાફિકની વધતી જતી સમસ્યા નું નિવારણ લાવવાની મહત્વપૂર્ણ જવાબદારી તેમના શિરે રહેશે તેમજ સેક્ટર 1 ના ઝોન 1 અને ઝોન 2ના પોલીસ મથકોની જવાબદારી પણ રહેશે. ડૉ. સુધીર દેસાઈ 2012 બેચના IPS અધિકારી છે અને 1લી જાન્યુઆરી 2026 ના રોજ જ તેઓની DIG તરીકેની બઢતી થયી છે. વડોદરા શહેરમાં પદભાર સંભાળતા પહેલા તેઓ ગાંધીનગર ખાતે ઇન્ટિલિજન્સ વિભાગમાં મહત્વપૂર્ણ જવાબદારી નિભાવી ચુક્યા છે.

વડોદરા શહેર પોલીસ કમિશ્નર નરસિમ્હા કોમાર

યુગ અભિયાન ટાઈમ્સ સાથે ટેલિફોનિક વાત કરતા વડોદરા શહેર પોલીસ કમિશ્નર નરસિમ્હા કોમારે જણાવ્યું હતું કે "બંને અધિકારીઓને જુદી જુદી જવાબદારી મળવાથી તેઓ તેમના કામમાં વધુ સમય ની સાથે વધુ ધ્યાન આપી શકશે. જેથી વડોદરા શહેરમાં ગુનાખોરી રોકવામાં, મહિલાઓ, બાળકો, વૃદ્ધો તેમજ શહેરીજનોની સુરક્ષામાં વધારો કરવામાં, સાઈબર ફ્રોડ અટકાવવા સાથે સાથે શહેરમાં ટ્રાફિકની સમસ્યા ન ઉદ્ભવે તેવા કાર્યો વધુ સારી રીતે કરી શકાશે. તેમજ શહેરમાં કાયદો વ્યવસ્થા ની સ્થિતિમાં હજુ વધુ સુધારો આવશે.