અમદાવાદનું નરેન્દ્ર મોદી સ્ટેડિયમ ફરી એકવાર ઐતિહાસિક ક્ષણનું સાક્ષી બનવા જઈ રહ્યું છે. 2023ની એ કડવી યાદોને ઐતિહાસિક જીતમાં બદલવા માટે સૂર્યકુમારની સેના ન્યુઝીલેન્ડ ના પડકાર સામે મેદાનમાં ઉતરશે. શું ભારત ત્રીજી વખત ખિતાબ જીતી નવો કીર્તિમાન સ્થાપિત કરશે કે ફરી ન્યુઝીલેન્ડ ભારતનું સપનું તોડશે? મેચની રણનીતિ અને પ્લેઈંગ-11 માં થનારા ફેરફારો આ ફાઈનલને વધુ રોમાંચક બનાવી રહ્યા છે.

ક્રિકેટ રસિયાઓ માટે રવિવારનો દિવસ ઐતિહાસિક બની રહેશે. ICC મેન્સ T20 વિશ્વ કપ 2026 ની ફાઈનલ મેચ રવિવારે સાંજે 7 વાગ્યે વિશ્વના સૌથી વિશાળ નરેન્દ્ર મોદી સ્ટેડિયમ, અમદાવાદ ખાતે રમાશે. આ મેચમાં યજમાન ભારત અને મેહમાન ન્યુઝીલેન્ડ ટ્રોફી જીતવા માટે આતુર છે. ભારતે સેમિફાઇનલમાં ઇંગ્લેન્ડ ને પછાડીને ફાઇનલમાં જગ્યા બનાવી છે, જ્યારે ન્યુઝીલેન્ડે દક્ષિણ આફ્રિકા ને હરાવી ઉલટફેર કર્યો છે.

અમદાવાદમાં 2023ની હારનો બદલો લેવાની સુવર્ણ તક
અમદાવાદનું આ મેદાન ભારતીય ચાહકો માટે ભાવુક યાદો ધરાવે છે. 19 નવેમ્બર, 2023 ના રોજ એક દિવસીય વર્લ્ડ કપની ફાઇનલમાં ઓસ્ટ્રેલિયા સામે મળેલી હાર હજુ પણ ઘણાના મનમાં યથાવત છે. રોહિત શર્મા ની આગેવાનીમાં ટીમની હારથી લાખો ચાહકો નિરાશ થયા હતા. જોકે, હવે સૂર્યકુમાર યાદવની કેપ્ટનશીપમાં ભારતીય ટીમ પાસે એ ઈતિહાસ ભૂંસીને નવો ઈતિહાસ રચવાની સુવર્ણ તક છે.

ભારત રચી શકે છે નવો કીર્તિમાન
જો ભારત આ ફાઈનલ જીતશે, તો તે T20 વર્લ્ડ કપનો ખિતાબ સતત બીજી વાર જાળવી રાખનાર (Defend) વિશ્વની પ્રથમ ટીમ બનશે. અત્યાર સુધી ભારતે 2007 અને 2024માં આ ટ્રોફી જીતી છે. હવે ત્રીજી વખત ચેમ્પિયન બનીને ભારત વર્લ્ડ ક્રિકેટમાં પોતાનું પ્રભુત્વ સાબિત કરવા માંગશે.

ન્યુઝીલેન્ડ ટીમનો પડકાર અને ભારતની ચિંતા
ન્યુઝીલેન્ડને હળવાશથી લેવું ભારત માટે જોખમભર્યું સાબિત થઈ શકે છે. મિશેલ સેન્ટનર કેપ્ટનશીપ હેઠળની ટીમમાં ફિન એલન અને ગ્લેન ફિલિપ્સ જેવા વિસ્ફોટક બેટર છે. બીજી તરફ, ભારત માટે ઓપનર અભિષેક શર્માનું પર્ફોમન્સ ચિંતાનો વિષય છે. ન્યુઝીલેન્ડના સ્પિનર કોલ મેકકોન્ચી શરૂઆતની ઓવરો અભિષેક માટે મુશ્કેલી ઉભી કરી શકે છે.

જસપ્રીત બુમરાહ બનશે ગેમ ચેન્જર?
ભારતનું સૌથી મોટું હથિયાર જસપ્રીત બુમરાહ સાબિત થશે. સેમિફાઇનલમાં ઇંગ્લેન્ડ વિરુદ્ધ તેની બોલિંગે તરખાટ મચાવ્યો હતો. આ સિવાય, સ્પિન વિભાગમાં વરુણ ચક્રવર્તી ના સ્થાને કુલદીપ યાદવ ને ટીમમાં સ્થાન મળવાની શક્યતાઓ છે, જેની 'ચાઇનામેન' બોલિંગ ન્યુઝીલેન્ડના બેટરોને મૂંઝવણમાં મૂકી શકે છે.

બંને ટીમોના સંભવિત 11 ખેલાડીઓ:
ભારત: સૂર્યકુમાર યાદવ (C), અભિષેક શર્મા, સંજુ સેમસન, ઇશાન કિશન, તિલક વર્મા, હાર્દિક પંડ્યા, શિવમ દુબે, અક્ષર પટેલ, જસપ્રીત બુમરાહ, અર્શદીપ સિંહ, કુલદીપ યાદવ.
ન્યુઝીલેન્ડ: મિશેલ સેન્ટનર (C), ફિન એલન, રચિન રવિન્દ્ર, ડેરિલ મિશેલ, મેટ હેનરી, લોકી ફર્ગ્યુસન, ડેવોન કોનવે વગેરે.