વડોદરા પાસેના ઔદ્યોગિક રૂપાપુરા ગામે જિલ્લા પંચાયત હસ્તકની પ્રાથમિક શાળા અત્યંત જર્જરિત સ્થિતિમાં છે અને તોડવાની મંજૂરી પણ આપી દીધી છે પરંતુ નવી સ્કૂલ બનતી નહીં હોવાથી બાળકો જોખમી સ્થિતિમાં કુલ બહાર બેસીને અભ્યાસ કરી રહ્યા છે.

વડોદરા જિલ્લા પંચાયત દ્વારા સંચાલિત પ્રાથમિક સ્કૂલમાં પાણી ભરાઈ જવાની પાણી ટપકવાની તેમજ શૌચાલય નહીં હોવાની ફરિયાદો થઈ હોવા છતાં હજી પણ અનેક સ્કૂલો જર્જરિત અવસ્થામાં છે અને વિદ્યાર્થીઓ જાનના જોખમે અભ્યાસ કરી રહ્યા છે. વડોદરાને અડીને આવેલા ઔદ્યોગિક વિસ્તાર રૂપાપુરા ગામે ચાલતી સરકારી પ્રાથમિક સ્કૂલની આવી જ સ્થિતિ છે. આ સ્કૂલની છતના પોપડા ખરી રહ્યા છે, સળિયા દેખાઈ રહ્યા છે અને વાયરીંગ નીકળી ગયું છે. જ્યારે પાણી ટપકતું હોવાની પણ ફરિયાદો થઈ છે.

નોંધપાત્ર બાબતો એ છે કે સ્કૂલને તોડી નાખવા માટે ખુદ જિલ્લા પંચાયત દ્વારા મંજૂરી આપવામાં આવી છે. પરંતુ તેમ છતાં આ સ્કૂલ તોડવાને બદલે ચાલુ રાખવામાં આવી છે અને જોખમ હોવાથી બાળકો સ્કૂલની બહાર બેસીને અભ્યાસ કરી રહ્યા છે. ગામજનોની રજૂઆતો સાંભળવામાં નહીં આવતી હોવાથી હવે આંદોલનની ચીમકી આપવામાં આવી છે.