લિફ્ટમાં માથું ફસાઈ જતા મોત વડોદરામાં લિફ્ટ અકસ્માતમાં યુવકનું મોત, ફાયર વિભાગે રેસ્ક્યૂ કરી યુવકના મૃતદેહને પોલીસને સોંપ્યો, હરણી પોલીસે તપાસ શરૂ કરી વડોદરા શહેરના વીઆઇપી રોડ વિસ્તારમાં એક દુઃખદ ઘટના સામે આવી છે, જેમાં લિફ્ટમાં માથું ફસાઈ જવાના કારણે એક યુવકનું મોત નીપજ્યું છે.

આ ઘટના વીઆઇપી રોડ પર આવેલી વૃંદાવન પાર્ક સોસાયટીમાં બની હતી, જ્યાં ટાઇલ્સ લગાવવાનું કામ કરતા કારીગરનું દુઃખદ અવસાન થયું છે. આ મામલે હરણી પોલીસે વધુ તપાસ શરૂ કરી છે. મૃતક યુવકની ઓળખ સંજયભાઈ રણછોડભાઈ પ્રજાપતિ  તરીકે થઈ છે. મળતી માહિતી અનુસાર, સંજયભાઈ વૃંદાવન પાર્ક સોસાયટીમાં ટાઇલ્સ લગાવવાનું કામ કરી રહ્યા હતા. ઘટના બની ત્યારે તેઓ લિફ્ટનું ટેસ્ટિંગ કરવા માટે ઉપર જઈ રહ્યા હતા. આ દરમિયાન, લિફ્ટની ઉપરની એંગલમાં તેમનું માથું ફસાઈ ગયું, જેના કારણે તેઓ ગંભીર રીતે લોહીલુહાણ થઈ ગયા હતા.

ઘટનાની જાણ થતાં આસપાસના લોકો ઘટનાસ્થળે દોડી આવ્યા હતા અને તેમની ચીસો સાંભળીને લોકોમાં હડકંપ મચી ગયો હતો. તાત્કાલિક વડોદરા ફાયર વિભાગને જાણ કરવામાં આવી, અને ફાયર બ્રિગેડની ટીમ ઘટનાસ્થળે પહોંચી હતી. આ ઉપરાંત, હરણી પોલીસ પણ તાત્કાલિક ઘટનાસ્થળે દોડી આવી હતી. ફાયર વિભાગની ટીમે યુવકને લિફ્ટમાંથી બહાર કાઢવાનું રેસ્ક્યૂ ઓપરેશન હાથ ધર્યું, પરંતુ દુર્ભાગ્યે સંજયભાઈનું ઘટનાસ્થળે જ મોત નીપજ્યું હતું. તેમના મૃતદેહને પોસ્ટમોર્ટમ માટે સયાજી હોસ્પિટલ ખસેડવામાં આવ્યો હતો. સમગ્ર મામલે હરણી પોલીસે અકસ્માતે મોત અંગેનો ગુનો નોંધીને તપાસ શરૂ કરી છે. પોલીસ અધિકારીઓના જણાવ્યા અનુસાર, લિફ્ટની ટેકનિકલ ખામી કે અન્ય કોઈ કારણો આ ઘટના પાછળ જવાબદાર છે કે કેમ, તેની તપાસ કરવામાં આવી રહી છે.