વિરલ ગોહિલ, ભરૂચ

ભરૂચ નગરપાલિકા દ્વારા લોકોના આરામ માટે બનાવેલા બેસવાના બાકડા (બેન્ચીસ)નો અનોખો ઉપયોગ પ્રકાશમાં આવ્યો છે. શહેરની નવી વસાહત – હિતેશ નગર વિસ્તારમાં તાજેતરમાં બનાવવામાં આવેલી ગટર લાઈનને ઢાંકવા માટે આ બાકડાની પાટિયાઓ (પ્લેટો) ગટર ઢાંકણા તરીકે મૂકવામાં આવી છે. લોકો માટે બગીચા, રોડ સાઈડ અથવા જાહેર સ્થળોએ બેસવાની સુવિધા આપવા માટે બનાવેલા આ બાકડા જાહેર નાણાંથી તૈયાર કરવામાં આવ્યા હતા. પરંતુ હાલ તે બેસવાની જગ્યાએ ગટર પર ઢાંકણા તરીકે ઉપયોગમાં લેવાતા હોવાનું પ્રકાશમાં આવતા અનેકો પ્રશ્નો ઊભા થયા છે.

સ્થાનિક નાગરિકો દ્વારા પ્રશ્ન ઉઠાવવામાં આવી રહ્યો છે કે આ બાકડા ગટર પર મૂકવાનો નિર્ણય કોણે લીધો? ક્યારે અને શા માટે આ રીતે તેનો ઉપયોગ થયો? બાકડાનો બાકીનો ભાગ ક્યાં ગયો? નગરપાલિકા તંત્ર આ મામલે નિષ્પક્ષ તપાસ કરશે કે નહીં તે અંગે પણ લોકોએ શંકા વ્યક્ત કરી છે. આ ઘટના લોકોના ટેક્સના પૈસાનો દુરુપયોગ છે કે નહિ તે બાબત હવે ચર્ચાના એરણે ચઢી છે. નગરપાલિકાની જાહેર મિલકતનો આ પ્રકારનો ‘દુરુપયોગ’ રોકવા તંત્ર પગલાં ભરાશે કે નહીં તે જોવું રહ્યું.