વિરલ ગોહિલ, ભરૂચ.

ભરૂચ જિલ્લામાં ભરૂચ-ઝઘડિયા-નેત્રંગની આંગણવાડી બહેનોને છેલ્લા કેટલાંક દિવસોથી અજાણ્યા નંબર પરથી ન્યૂડ કોલ આવી રહ્યા છે. આવા કોલથી આ બહેનો ઘરમાં, કાર્યસ્થળે કે જાહેરમાં શરમજનક સ્થિતિમાં મુકાઈ રહી છે. ભરૂચ, ઝઘડિયા અને નેત્રંગ તાલુકાની કુલ 50થી વધુ બહેનોને રોજેરોજ આવી રીતે હેરાન કરવામાં આવી રહી છે. આશ્ચર્યજનક રીતે આ કોલ સરકારશ્રીએ આપવામાં આવેલા આઇસીડીએસ નંબર પર પણ આવી રહ્યા છે, જેના કારણે બહેનો સરકારી કામકાજમાં પણ મુશ્કેલી અનુભવી રહી છે.

આ મામલે આંગણવાડી બહેનોમાં ભારે રોષ ફાટી નીકળ્યો છે. મહિલાઓના આંગણવાડી કર્મચારી સંગઠનના ગુજરાત ઉપપ્રમુખ રાગિણીબેન પરમારે આક્રોશ વ્યક્ત કરતાં જણાવ્યું કે જો તંત્ર આરોપીને પકડવામાં નિષ્ફળ રહેશે તો અમે બહેનો જ સબક શીખવડાવશું. મહિલાઓની માનસિક શાંતિ છીનવતી આ હરકત સામે ભરૂચ સાયબર ક્રાઈમમાં સત્તાવાર ફરિયાદ દાખલ કરવામાં આવી છે. હવે તંત્ર સામે મોટો સવાલ ઊભો થયો છે, મહિલાઓના ડિજીટલ સુરક્ષા માટે કઈ રીતે પગલાં લેવામાં આવશે?

આ ઘટના માત્ર હેરાનગતિ સુધી સીમિત નથી રહી, પણ હવે તે મહિલા માન,અસ્તિત્વ અને સરકારી વ્યવસ્થાની નિષ્ફળતાને પ્રકાશિત કરતી ગંભીર સાયબર ગુનાની ઘટનામાં ફેરવાઈ છે.